Përzgjedhësi i Kosovës në basketboll, Brad Greenberg, ka përcjellë nga afër paraqitjen e Estonisë dhe është i vetëdijshëm që të përzgjedhurit e tij i pret një ndeshje e vështirë. 

Estonia të mërkurën nga ora 17:30 e pret Kosovën në Tallin, në kuadër të grupit C të parakualifikimeve për botërorin e vitit 2019.

Estonia të shtunën mbrëma në Shkup fitoi ndaj Maqedonisë me shifrat 80:76. Po me katër pikë dallim, Kosova e kishte mposhtur Maqedoninë të mërkurën e kaluar në Prishtinë (72:68) në ndeshjen hapëse të parakualifikimeve.

Kështu pas dy ndeshjeve të para Kosova e Estonia janë në përparësi për të zënë dy vendet e para në grupin me tri përfaqësuese, vende që sigurojnë kalimin në raundin tjetër, përkatësisht shmangun rënien në Divizionin B.

Ndeshja e së mërkurës në Tallin pritet të jetë me shumë peshë. Kosova menjëherë të shtunën luan në udhëtim me Maqedoninë, ndërsa Estoninë e pret më 19 gusht.